LA RUBRICA
Prime zornade di feriis. Di fat, Mara no veve nissun program e, plui

Sabato 9 Novembre 2019
LA RUBRICA
Prime zornade di feriis. Di fat, Mara no veve nissun program e, plui che cjapâle cun calme, no varès savût ce fâ. Nancje che le vessin scoltade intes sôs elucubrazions, il telefonut al sune: la sô amie Claudia e sta lant a Triest cu la famee par fâur viodi ai fruts la Grote zigante e, se Mara e vûl, e je la benvignude. Di buride alore si fâs la doce, si met sù la prime maiute che e cjate e in cinc minûts e je pronte. Claudia i veve dit alc sul fat dal mangjâ, di puartâsi un golfut e une gjachetute pal frêt, ma pe premure no i veve dade masse bade. Pe strade, par vie che si sintivin in vacance, i fruts a vevin bielzà sfulminât sedi i panins che lis pomis e, anzit, a stevin bruntulant cu la mari parcè che a vevin une fam mostre. La grote e je pardabon grandone: intal imprin une vore di scjalins par rivâ a plui di cent metris sot tiere, po dopo, de sale dal altâr, e je une altre grote plui picinine e si rive a cucâ la jentrade de grote segrete che e va jù passe par 250 metris. Dopo un pôc che a jerin dentri, Mara e à tacât a sintî frêt; li dentri a son dut l'an 11 grâts fis: ve ca il parcè che la sô amie i veve dite di puartâsi un maionut di plui. A un ciert moment lis lûs a àn tacât a lampâ e parie a piâsi i indicadôrs di direzion di emergjence. Ducj fers e intant Mara cuntune criùre di chês, tant che i dincj i vevin tacât a bati in bocje di bessôi. Daspò un cuart di ore di chel patiment lis lûs a son tornadis ae normalitât e, infin, a son rivâts a tornâ a viodi il soreli. Si fâs par mût di dî... intant che a jerin sot, il timp si jere vuastât di brut. Plomps tant che poleçs a son rivâts in machine e par vie dal timp, maman ghiringhel. E jere rivade cjase che e tremave, e scotave e stant che e veve però une fam di chês e a parât jù dut ce che i jere capitât a tîr. Ae fin une indigjestion memorabil e trê zornadis intal jet cu la fiere a 39. (Cu la colaborazion de Arlef).
© RIPRODUZIONE RISERVATA

PIEMME

CONCESSIONARIA DI PUBBLICITÁ

www.piemmemedia.it
Per la pubblicità su questo sito, contattaci