LA RUBRICA
A viodilu li nol pâr nancje mâl cu la sô biele gjachetute,

Domenica 24 Marzo 2019
LA RUBRICA
A viodilu li nol pâr nancje mâl cu la sô biele gjachetute, lis braghessis cu la rie precise, la cjamese blancje, la golarine a balins, un biel colôr di muse e une riduçade su la bocje. E sì, so pari i à simpri tignût a aparî a puest: nol fos che al è distirât intune casse, si podarès pensâ che al stedi fasint la comedie. Cussì nol è, però. No je coventade a nuie la sô foghe pal lavôr, e nancje dut il lustri che intai agns si jere piturât intor. Cuant che e clame, e clame, e nissun al pues fâ fente di no sintî. E duncje, vuê, al scuen compagnâlu pe ultime volte e, tant che il solit, il pari denant e lui daûr. Cjaminant viers il cimitieri i pinsîrs a svolin lontan intal timp. Passe trente agns a son za passâts dal prin viaç fat insiemi in Lussemburc par cuistâ il machinari che dutis lis piçulis aziendutis a volevin, ma di fat nissun al veve la olse di spindi ducj chei milions par vêlu. So pari invezit la veve nasade: in graciis di chê machine e de ghigne che al à simpri vude gole di mostrâ, dopo di chel viaç dut al veve scomençât a zirâ de bande juste e i afârs a cressi cence recuie. Une cjosse però, fin in dì di vuê, nol è mai rivât a capî: cuissà se so pari si è tant lambicât parcè che i plasevin lis sfidis o nome par pôre di no jessi avonde considerât di chei altris? Ma di doman i tocjarà a lui di lâ indenant, par fortune suntun troi za ben pichetât di sô pari ma, dut câs, di cumò indevant a saran lis sôs spalis a scugnî puartâ dut il pês. Cul lâ dal timp, si è fate une sô idee: lis robis e lis peraulis di râr a àn il valôr che si ur da e dispès si barufe o si inrabiisi par fufignis, restant daspò cence fuarcis par frontâ chel che al merete dut il nestri impegn. Il fat che ducj cuancj, prime o dopo, o vedin di tirâ il pît, al varès di jessi un sburt par vivi miôr, impen che sfuarçâsi a dâsi di fâ nome pe innomine. (Cu la colaborazion de Arlef).
© RIPRODUZIONE RISERVATA
© RIPRODUZIONE RISERVATA

PIEMME

CONCESSIONARIA DI PUBBLICITÁ

www.piemmemedia.it
Per la pubblicità su questo sito, contattaci